1Cor 11 | ASO | STEP | Ido' naza Kilisito' monovolo' e'meto ogo molo nouvoni' ne'mine igi linginesi neni' monovolo' ningi ne'meti igi mili minilo.

1 Corinthians 11

1 Ido' naza Kilisito' monovolo' e'meto ogo molo nouvoni' ne'mine igi linginesi neni' monovolo' ningi ne'meti igi mili minilo.

Vene' Ingine Nene Engito' Gizebo I Minave Nizani' Nenako O'mosola Lili Ma Godo'nido' Inite' Gihi Mini Lilizave Lo Paulo' Lo-ngimine'

2 Lingine nene naza apize lengemo lo-lingimuvoni' initekumu' nene e'meti gili minaa' nani' nemu' longopo'ni lo do naba noo-lingiduve. 3 Ido' naza gamazi mene gili guni i minilizave losa nolo-lingimuve. Veneliti gizebo ve'ine nene vemoho' nene nizave. Ido' vemoholiti naba'ine nene Kilisito' ne neive. Ido' Kilisito' naba've nene O'moso ne neive. 4 Lingine mo gili nizave. Leze monovola nene godotela inite' ma do geheso' nene monovo ne'mino neive: Evene' leze gizebo vete ma neive losa godotelo' nene inite' ma gehaa' noune. Ne neine'za O'moso ne'mo vemoho' nene ei' avazaha ei' ne'minosa lolo' ogavosa ne'mo nene vemoho' ivile' igi miniliza inite' nene ma minamani' ve. Nemu' nene ve mali'mo O'mosola lilihe O'moso'mi veleti' gamazi lo soto' ilihe ne'mine noilingu' godololo' inite' ma gehe mino liline' nene ei' godolo nene do u'musupo lizine' geleleseinako nemu' nene inite' ma gehamosa lilive. Ne neine'za O'moso'mo vene' nene vemoho' avazaha ne'mine lolo' ogo hize ele' ilingumu' ve lo do soto' o-dine' ve. Nemu' nene vene' ma aza O'mosola lilihe O'moso'mi veleti' gamazi ma lo soto' ilihe ne'mine noilingu' godololo' inite' ma gehamo liline' nene ei' godolo've ma nene do u'musupo lize-deleseinako godololo' inite' gehosavo' lilive. Ido' vene' ma aza godololo' inite' ma gehamiline' nene monovo golosolokovo' monaa' ani' alu nene godo'nido' inite' gihamaa' naanako aza nene engi' ne'mine mineleseinako godolo zopovo nene monovo golosolo' monaa' ani' alu huki-ngidaa' ani' ne'mini huki-dilisave. Ido' vene' aza godo'ne zopovo huki-nidikevo novozo helo minalove lo gelo ma godololo' nene inite' ma gehelive. 8 Ee, vene' ingine vemoholiti avazaha mini hizi ele' i-ngidilizado' minani' ve. O'moso aza vemoho' nene gana' venetati' do soto' o-davo soto' ine' nomive. Vene' nene gana' vemohotati' do soto' o-davo soto' ine' ve. 9 Ido' vemoho' nene vene' nemu' ve losa do soto' o-damive. Asi vemohokumu' ve losa vene' nene do soto' molo-dine' ve. 10 Nemu' nene angelo' ingine ningi va'ninginemu' gili nizave li ngolize izilizangisi vene' ingine godo'nido' nene va'ningi amuzolo' none lisa inite' ma gihisa minilizave. 11 Ee, vene' ingine va'ningi amuzolo' minilisaha O'moso aza vene' nene gana' vemohotati' do soto' o-davo neloti' vemoho' nene venetati' soto' iga' naanako vemoho' minamadiniko venekisi minamadine. Ido' a'mine'mine ogo vene' minamadiniko vemohokisi minamadine. Ido' inite' muki' O'mosolati' soto' ani' nemu' nene Guvelesi ve'mi evenele laza gilune' nene vemoho' dizi minikevo vene' limi minikevo minamo lisihe' ogovo' none. 13 Langisetine ningi gili hehe lilo. Vene' mali'mo godololo' inite' gehamo evene' ve'nido' O'mosola liline' nene edelihe. Ne mo edamoloseive. 14 Evene' ingine gozopo' vomilati' igi mili minani' monovo danavamu' gililizani' nene ti' li gililisave: Vemoho' ingine godo'ine zopovo nene hukami hulikilizani' nene edamoloseiha 15 venelite godo'ine zopovo ha'na hulikilizani' nene O'moso ne'mo godo'nido' gehaa' angili' ne'mine nene oko'nine'mi gonolise ne'minosa ngeme neive. 16 Ne neine'za ve mali'mo a'mine noluvongumu' nene lolize gani ma liline' nene nazasi ido' neze gono'neu' minavesi laza vene' haza inite' godo'nido' gihami mini O'mosola lilizave lo gele ngemesa'mune. Ido' O'moso'mi zuho Izesu' evenele gohi masi ido' mulise'ine mini'mi monangu' nesi nene a'mine monovomu' gili ngimisa'mave.

Kolidi Aleve Lebeni Inite' Nalisa Di Nubuho Igi Minangu' Monovo Di Goloso Igi Minaa' Ani' Monovomu' Nene Paulo' Line'

17 Ido' naza inite' monovo ma di goloso iga' nani' ma giluvoni' nemu' nene siza lo do naba o-lengedamo gatine do loloze. Gililo. Lingine noso' nitekisi lebeni initekisi nalisa di nubo iga' nani' ne'mo nene monoku' hize ele' o-lengedeleseine'za lingine igi di nubo angu' nene monovo lamine' e'metisa'mani' ne'mo nene do goloso o-lengedaa' neive. 18 Nene evene' malite ti' li li-nimangumu' noluve: Lingine noso' nitekisi lebeni initekisi nalisa di nubo angu' nene mine hamo' igi lebeni inite' namisa hizi ho'li minaa' nave. Ido' lengi' mulisetine nene ho'li ize' mili vi ato ato' ma ilizani' nene lengi' mulisetingu' evene' lisihe' monovo laminekovo' igi mili minaa' ave ma nene soto' pizi minilizangumu' nene ne'mine ilisanako nemu' nene a'mine gamazi li-nimanguti' linge ma nene mo lamineto' noloseive losa gele nouve. 20 Neze nene ti' li li-nimave: Noso' nite' igi nalisa ado' nene gomu' ma ave ingine alinge' ma alizavemu' nene gizebo ami noso' nite' nene ni gatu'ine iga' ido' noso ni negi hizaa' ikevosa alinge' ave nene nami ga'na hili di vaa' nave. Nemu' nene lingine lebeni inite' nalone li igi di nubo igi ni minaa' nani' nene Guvelesi ve'mi lebeni inite' nonube li haza inite' nene ni minaa' nave. 22 Nadive. Lingine noso' nite' ni miniliza numudine nene nomihe. Ido' lingine O'moso'mi zuho mulise nemu' gilavo haza inite' lolo' ogavo leze zuho linge ma inite'ine nomine' mini noso' nite' di amilizave nene ngovozo hililizave lisa iga' nahe. Nemu' naza nadive lo-lengedelove. Longopo'ni lo do naba o-lengedelohe. E'e, mo o'ove. Ne'mine mo amolosuve.

Lebeni Inite' Naa' Monovo Nene Di Gopo Igi Mini Nalizani' Nene O'moso'mo Lihime nGemalive Li Monovo'ine Di Lisihe' I Mini Nalizangumu Lo-ngimine'

23 Naza lebeni inite' naakumu' lo-lingimuvoni' gamazi nene Guvelesi velati' giluvoni' nenako lingine a'midokovo' e'meti minilizanako e'metamave. Naza ti' lo lo-lingimuvoni' ma neive: Zuda' aza Izesu'ni lovo ve ngelebizine' gameneu' nene olihe lovo ve ngelebizamivo holuka' izipahala zuhosi minangu' Guvelesi ve Izesu' aza beleti do 24 O'mosola opo'ni lo apilo izipahala zuho nongemo ti' lo line': Mene neni' me'mele'ne lengikumu' ve losa nolingimuze. Nenikumu' gili minilizangumu' di ni'mi vi minilo. 25 Ido' a'mine'mine ogo ve'nine ni osu' likevo vaini nososi minine' gomise ma do oto ti' lo line': Gomiseu' mene neni' vanise'ne O'moso'mo lo huko-lingidine' gamazi gosoho' ma nene do amuzo molalingumu' vanise'ne mene di nalo. Ido' di ni'mi vi mini naliza gamene mukiku' nene nenikumu' gili mini naa' ilizani' ve. 26 Ne'mine line' nenako lingine lebeni inite' vaini nososi beleti nesi naliza gamenelo' gamenelo' nene Guvelesi ve hiline' gamazi nene li soto soto' i'mi vi minilisave. Ido' ne'mine i'mi vi nizavo Guvelesi ve tine' molo aline' gamene aliteleseive.

27 Nemu' nene ve ma ingine Guvelesi ve'mi lebeni inite' vaini nososi beletisi nene monovo'ine di lisihe' ami gopo haza nalizani' nene Guvelesi ve'mi me'melesi vanisesi nene di gopo ikevosa lihime dalisave. 28 Ve ma ingine Guvelesi ve'mi me'mele vanise nene kekeize inite' neive li gilami gopo ma nalizani' nene O'moso'mo lihime ngemelido' o neine' nenako nemu' nene Guvelesi ve'mi me'mele vanise nali ma gomu' nene lutingu' monovo goloso nolingumu' nene vise' igi di hulisavo' nene nalo. 30 Ee, lebeni inite' gopo' napa naa' ave nene O'moso'mo lihime ngemeline' o neine' nenako lengikuti' linge muki' ingine ne'mine igi gopo' napa nadi'mo gilizevo igi inite' gizi davo linge ma nene hili osu' lani' ve. 31 Laza ne'mine mana'mine olo ma leli' monovotemu' gomu' gelo do lisihe' ogosa ne'mine oga' unidiniko Guvelesi ve ne'mo lihime lemo do goloso o-ledamidine. 32 Ido' idise mene gameneu' Guvelesi ve'mo lihime leme'mo novine' nene aza evene' linge ma O'mosomu' gilamave lihime ngemo do goloso o-ngedelingu' nene lezesi ne'mine o-ledalove losa monovote goloso nene do soto' o-ledo vete zopovo si'zeloningumu' nene ne'mine nooloseive. 33 Nemu' nene neze zuho mate, noso' nitekisi lebeni initekisi nalisa igi di nubo niigi ma nene lingine zuho amani' nene ikevo maka' nalone li gizebo mini ikevosavo' nene nalo. 34 Lingine igi di nubo ilizangu' nene ve linge ma gomu' igi heteli nizavo ga'na ngolavo alinge' alizavemu' gilami gomu' imi mini noso' nite' nalizani' ne'mo Guvelesi ve'mo lihime lengemeline' akau' mini milikelizanako nemu' nene noso' nite' ngomo numu'nidati' gomu' nikisavo' nene alizave. Ido' nemu' gamazi gohi ma lo-lengemeloni' neine' nene naza lingine nizada alongu' nene lo-lengemelesuve.